ஏழு கடல் தாண்டி பாபா செய்த அற்புதம்!

நான் புதுவை மாநிலத்தைச் சேர்ந்தவன்.  என் பெயர் கார்த்திக். எனது மூத்த சகோதரர் ஆஸ்திரேலியாவில் ஒரு தனியார் ஐடி நிறுவனத்தில் பணியாற்றி வருகிறார்.  கடந்த மாதம் திடீரென அவர் நாக்கில் சிறிதளவு கட்டி வந்தது. மறுநாளே நாக்கு முழுவதும் பரவி தொண்டையையும் பாதித்தது. பேச முடியாமல் தண்ணீர் கூட குடிக்க முடியாமல் மருத்துவ மனைக்கு கொண்டு செல்லப்பட்டார். அங்கு அவருக்கு அனைத்து மருத்துவப்பரிசோதனைகளும் செய்யப்பட்டன.

ஆயினும் மருத்துவர்களால் அது என்ன நோய் என்றும் எதனால் எப்படி வந்தது என்றும் கண்டு பிடிக்க முடியவில்லை. அவர் நாக்கில் இருந்த கட்டியின் சீழை எடுத்துப் பரிசோதனைக்கு அனுப்பி வைக்கப்பட்டது. ஒரு வேளை வாய்ப்புற்று நோயாக இருக்கும் என்று கூறினார்கள். மருத்துவர்கள் அண்ணியிடம், அண்ணனை வீட்டுக்கு அழைத்துச் செல்லுமாறும், பரிசோதனையின் முடிவு வந்த பிறகுதான் சிகிச்சை அளிக்க முடியும் என்று கூறி வீட்டுக்கு அனுப்பி வைத்தார்கள்.

பன்னிரெண்டு நாட்களாக யாரிடமும் பேசமுடியாமல் உணவு உட்கொள்ளாமல் வெறும் இளநீர் தண்ணீர் அருந்திக்கொண்டு மிகவும் சிரமப்பட்டுக் கொண்டிருந்தார்.

இதற்கிடையில் பரிசோதனை முடிவுகள்ஒன்றின் பின் ஒன்றாக வந்தது. எல்லாம் நார்மலாகத்தான் இருந்தது. மருத்துவர்கள் குழம்பிவிட்டார்கள். நாக்கிலிருந்து எடுக்கப்பட்ட சீழ் பரிசோதனை முடிவும் மவுத் கேன்சர் என்றில்லை என்று வந்தது.

ஆனால் இது என்ன கிருமி, எப்படி வந்தது என்று அவர்களுக்குத் தெரியவில்லை. ஒரு கட்டத்தில் அவரை இந்தியாவுக்கு அழைத்து வந்து சிகிச்சை மேற்கொள்ளலாம் என்று அண்ணி முடிவெடுத்து என்னிடம் தெரியப்படுத்தினார்கள்.

புதிய கிருமியாக இருக்கும் பட்சத்தில் இது பிறருக்குப் பரவுவதற்கு வாய்ப்பிருக்கும் என அரசாங்கம் இந்தியாவுக்குத் திருப்பி அனுப்பிவிடும். ஏனெனில் இந்தக் கிருமி பற்றிய மேல் பரிசோதனையை அமெரிக்காவுக்கு அனுப்பியிருக்கிறார்கள்.. அதற்குள் நாம் இந்தியா அழைத்து வந்துவிடலாம் என்பது தான் அண்ணி கூறிய விக்ஷயம்.

”இன்னும் இரண்டு நாட்கள் சற்று பொறுமையாக இருங்கள் பார்ப்போம்”, என்று கூறிவிட்டு, நான் சீரடியாக நினைக்கிற பெருங்களத்தூர் வந்தேன். சாயி வரதராஜன் வடிவில் உட்கார்ந்திருந்த பாபாவிடம் இதைக் கூறினேன். அவர் சிறிது நேரம் பிரார்த்தனை செய்துவிட்டு,  “அண்ணனுக்கு உதி கொடு!” என்றார்.

”அவர் ஆஸ்திரேலியாவில் இருக்கிறார்!”  என்று கூறினேன். ”நம்பிக்கை இருக்குமானால், என் அண்ணன் குணமாகவேண்டும் என பாபாவிடம் வேண்டிக்கொண்டு தினமும் சாப்பிடுங்கள். இப்படித்தான் சென்னையில் என் பையனுக்கு உடம்பு சரியில்லாதபோது, சீரடியில் இருந்த நாங்கள் சாப்பிட்டோம். பையன் குணமானான். இதை நீங்களும் செய்யுங்கள், உங்கள் அண்ணன் குணம் அடைவார்!”  என்று கூறி அருளாசி வழங்கினார்.

பாபாவிடம் (சாயி வரதராஜனிடம்) உதி பெற்றுக் கொண்டு ஊர் திரும்பினேன். அன்று மாலை பாபாவிடம் பிரார்த்தனை செய்துவிட்டு உதியை என் நாக்கில் முழுவதும் தடவிக் கொண்டு, பாபா நாமத்தை கூறி முழு நம்பிக்கையுடன் வேண்டிக் கொண்டேன். மறுநாள் காலையிலும் அதேபோல் செய்தேன்.

சுமார் மதியம் மூன்று மணியளவில் என் அண்ணன் தொலைபேசியிலிருந்து அழைப்புவந்தது. மிகவும் உற்சாகத்துடனும், சந்தோக்ஷத்துடனும் தொலைபேசியை எடுத்தேன். என்ன ஆச்சர்யம்! என் அண்ணன் பேசினார். பன்னிரண்டு நாட்களாக பேசமுடியாமல் இருந்த அவர் பேச ஆரம்பித்துவிட்டார். மேலும், நேற்று இரவிலிருந்து கட்டிகள் குறைந்து கொண்டிருந்தது எனவும், இன்று முழுமையாக மறைந்துவிட்டது என்றும் கூறினார். உணவும் சாப்பிட முடிகிறது என்று கூறினார். உடனே அவரை மருத்துவரிடம் அழைத்துச் சென்று மீண்டும் பரிசோதனைகள் செய்தார்கள். மருத்துவர்கள் வியப்படைந்தார்கள்! எந்த மருந்தும் கொடுக்கவில்லை, எப்படி குணமடைந்தது என்று வினவினார்கள்.

மீண்டும் எடுக்கப்பட்ட பரிசோதனை முடிவுகள் பாசிடிவ்வாக வந்தது. இன்றுவரை மருத்துவர்கள் புரியாமல் உள்ளார்கள். மனித சக்தியால், அறிவால் பாபாவுடைய அற்புதங்களையும், செயல்களையும் அளக்க, அறிய முடியாது என்பதற்கு இது ஒரு மிகப் பெரிய உதாரணம் ஆகும். இப்போது என் சகோதரர் பரிபூரணமாக குணம் அடைந்து குடும்பத்துடன் சந்தோக்ஷமாக உள்ளார்.

ஒரே இரவில் ஏழு கடல் தாண்டி பாபா செய்த அற்புதம் இது. என் பாபாவுக்கு கோடானு கோடி நன்றி எனக் கூறினார் அது மிகையாகாது. எனவே அவர் பாதம் பணிந்து வணங்குகிறேன்.

சாயி குழந்தைகளுக்கு ஒரு வேண்டுகோள்..

நான் எப்பொழுது பெருங்களத்தூருக்கு வரும் போதும் எனக்குள் தோன்றுகிற ஒரு விக்ஷயம். இது சீரடிதான். நான் சீரடிக்குத்தான் வருகிறேன். இங்கு பாபாவுடன் (சாயி வரதராஜனுடன்) பேசுகிறேன், பிரார்த்திக்கிறேன், அருள் பெறுகிறேன் என்றுதான் நினைத்து வருவேன்.

ஆம், சாயி வரதராஜனிடம் பாபா நிறைவாக உள்ளார் என்று கூறுகிறார்கள். அது என்னைப்பொறுத்தவரை எண்பது சதவிகித நம்பிக்கையை மட்டுமே தருகின்ற ஒன்றாக இருக்கிறது. மாறாக, பாபாதான் சாயி வரதராஜன் வடிவில் இருக்கிறார் என்று நான் எப்பொழுதும் நம்பி வணங்குவேன். இது நு}று சதவிகித நம்பிக்கையை அளிக்கிறது.

இனி எல்லோரும் சீரடிக்குப் போவதாக, பாபாவுடன் பேசுவதாகத் தெளிவடைந்து பெருங்களத்தூருக்கு வந்து பிரார்த்தனை செய்யுங்கள். அது உங்களுக்கு மிகப்பெரிய உற்சாகத்தையும் நம்பிக்கையையும் தரும் என்பதில் மாற்றுக் கருத்துக்கிடையாது.

பிரார்த்தனையை மட்டும் கொண்டு வாருங்கள், போகும்போது நம்பிக்கையையும் உதியையும் எடுத்துச் செல்லுங்கள். பிறகு அனைத்தும் அப்பா பாபா பார்த்துக் கொள்வார். என் நம்பிக்கை இதுதான்.

ஜெய் சாய்ராம்.

 சாயி கார்த்திக், பாண்டிச்சேரி

உன் முழு இதயத்தோடு சரணடை!

சத்சரித்திரம் நமக்குக் கற்றுத்தருகிற உண்மையான ஒரு பாடம்,  ஞானிகளிடம் சரணடைதல்! நமது ஆன்மீகம் குரு வழிபாட்டைஅடிப்படையாகக்கொண்டது.  குருவே பரப்பிரம்மம் என்ற கோட்பாட்டை வலியுறுத்துகிறது.

இந்த உலகில் போதிக்கப்பட்ட இறை தத்துவங்கள் குரு அருளால் அறிமுகப்படுத்தப் பட்டவை. இன்று நாம் வணங்கும் எல்லா தெய்வ வடிவங்களும் குரு உபதேசம் செய்து வாழ்ந்த மகான்களின் வடிவங்கள் என்றால் அது மிகையாகாது. இதனால்தான் நீங்கள் வாழ வேண்டுமானால் குருவின் திருவடித்தாள்களைப் பணியவேண்டும் என ஆன்மீகம் வலியுறுத்துகிறது.

இன்றைக்கு நீங்கள் மதிக்கிற சாயிவரதராஜன் என்கிற எனக்கு உங்கள் அளவுக்கு பக்தியில்லை, ஞானம் இல்லை, வழிபாடு கிடையாது. ஆனால் தெய்வ அனுக்கிரகம் அதிகம் இருப்பதாக உணர்கிறேன். காரணம், நான் எந்த ஞானியைப் பார்த்தாலும் சாஷ்டாங்க நமஸ்காரம் செய்து, முழு மனதோடு பணிவதுதான் காரணம்.

ஒரு சில போலி ஆன்மீக அமைப்புகளும், போலி ஞானிகளும் நம்மிடையே இருக்கிறார்கள். இவர்கள், மற்றவர்கள் கால்களில் விழுவது அபச்சாரம் என போதிப்பார்கள். நான் இதை ஆதரிப்பது கிடையாது.

ஞானிகள் கடவுள் ரூபம் என்ற உண்மையை உணர்ந்து கொண்டவர்கள் யாரும் இதை ஆதரிக்கமாட்டார்கள். ஏனெனில், இந்த உடல் செய்த பாவங்கள் அனைத்தும் ஞானிகளின் திருவடிகளை நமஸ்கரிக்கும்போது அழிகின்றன. அதாவது நமது பாவங்களை அவர்கள் ஏற்றுக்கொள்கிறார்கள். இதனால் நமது உடல் புனிதமடைகிறது. இறை அனுபூதி கிடைப்பதால், நமது ஆன்மாவுக்கு மோட்சம் கிடைக்கிறது. உலக வாழ்க்கையில் ஞானிகளுடைய கருணை மிக்கப் பார்வையும், ஆசீர்வாதமும், பிரசாதமும் எல்லாத் துன்பங்களையும் ஒழிக்கின்றன.

”ஞானிகளுடைய கருணா கடாட்சமும், ஆசீர்வாதமும், பிரசாதமும் எல்லாத் துன்பங்களையும் ஒழிக்கின்றன. வேறு எதுவும் தேவையில்லை”. என்று சத்சரித்திரம் அத்தியாயம் 13 - 153 ம் வசனம் உறுதிப்படுத்துகிறது.

ஞானி என்றால் யார்?

தன்னை அறிந்தவன் ஞானி. நிறைய பேர் தன்னை அறியாமல் இருந்தும் ஞானி என சொல்லிக் கொள்கிறார்கள். ஒரு சில மந்திர தந்திர விஷயங்கள் இருந்தாலோ, சாமியாடினாலோ தம்மை ஞானி என நினைத்துக் கொள்கிறவர்கள் அதிகம். இவர்கள் உண்மையில் அஞ்ஞானிகளே.

இத்தகையவர்களின் பாதங்களை நமஸ்கரிப்பதால் நமது பாவம் போய்விடுமா? என்றால், நிச்சயம் போகும் என்பதுதான் உண்மை. மெய்ப்பொருள் நாயனாரை கத்தியால் குத்திய முத்த நாதனைக் கொல்ல, நாயனாரின் மெய்க்காவலர் முயன்றபோது, தத்தா!  இவர் நம்மவர் என்று நாயனார் கூறி தடுத்து தரையில் சரிந்தார் என சாஸ்திரம் கூறுகிறது.

பொய்யடியாரையும் மெய்யடியாராக நினைத்து வணங்குவது உண்மையான பக்தரின் நிலை. அதற்கான பாவ புண்ணியத்தை ஏற்றுக் கொள்ள வேண்டியது அவர்களின் நிலை. மெய்யடியாரை வணங்கும்போது, அவர்களிடம் இருந்து புண்ணியமும், அருளும் நம்மிடம் வரும். நம்மிடமுள்ள பாவங்கள் அவர்களுக்குச் செல்லும். அவர்கள் இறையருளால் அந்தப் பாவங்களைப்போக்கிக் கொள்ள முடியும். ஆனால், நம்மிடமிருந்து பாவம் கடத்தப்படும் போது பொய்யடியார், மேலும் பாவம் சேர்ந்தவராகி பெருந்துன்பத்திற்கு ஆளாவார்.

அவரிடமிருந்து எந்த பாவமும் நமக்கு வராது, மாறாக, அவரிடம் மிச்சம் மீதி எஞ்சியிருக்கும் புண்ணியப் பலன்கள் நமக்கு வந்துவிடும். ஆகவேதான், பிறரது பாதங்களை நமஸ்காரம் செய்யும்போது, இறைவா இது உனது பாதம் என எண்ணிச் சரணடைகிறேன் என்று கூறுங்கள். அனைத்தும் சாதகமாகவே நடக்கும்.

சத்சரித்திரம் கூறுகிற விக்ஷயங்களை சற்று தியானித்துப் பார்க்கலாம்.

நாமஸ்மரணம், வழிபாடு அல்லது பக்தி போன்ற சாதனைகள் உங்களிடம் இல்லையாயினும், ஞானிகளிடம் உங்கள் முழு இதயத்தோடு சரணாகதி அடைவீர்களானால், இவ்வுலக வாழ்வு என்னும் பெருங்கடலுக்கு அப்பால் அவர்கள் நம்மை பத்திரமாக இட்டுச் செல்வார்கள்.

நாமஸ்மரணம்:

கலி காலத்தில் மனிதர்களின் பாவங்களை அழிப்பதற்காக தவம், யாகம் போன்ற கடும் முயற்சியில்லாமலேயே பகவானின் நாமத்தை ஒன்றிய மனத்தோடு சொன்னாலே பாவம் போய் விடும் என்பது பகவான்  ஸ்ரீ கிருஷ்ணர் திருவாக்கு. நமக்கு மனம் ஒன்றாது, நாம ஜெபம் செய்யவும் முடியாது. என்ன செய்யலாம்? ஞானிகளின் பாதங்களைப் பிடித்துக் கொண்டால் போதும்.

வழிபாடு்

நம்முடைய கோரிக்கைகள் நிறைவேற நாம் இறைவனை வழிபடுகிறேhம். நம்முடைய கோரிக்கை நிறைவேறா விட்டால், எப்படி வழிபாடு செய்வது என்று திகைக்க நேரிடும்.

சத்சரித்திரம் கூறுகிறது: இறைவனின் ரூபம் நமது மனதில் பதிக்கப்பட வேண்டும். புலன் அனைத்தும், மனமும் எப்போதும் இறைவனது வழிபாட்டிற்கே உரித்தாக்கப்படட்டும். வேறு எவ்விதப் பொருட்களிலும் எவ்விதக் கவர்ச்சியும் வேண்டாம். உடல், செல்வம், வீடு முதலிய வேறு எதைப் பற்றியும் மனது அலைந்து திரியாமல் எப்போதும் இறைவனை நினைத்துக் கொண்டிருப்பதிலேயே மனதை நிலை நிறுத்துங்கள்.

இப்படி செய்வதுதான் வழிபாடு. இதைத் தவிர எட்டு வித உபசாரம், பதினாறு வித உபச்சாரம் என்று இறைவனுக்கு உபச்சாரம் கூறி வழிபட வேண்டிய நிலையும் இருக்கிறது. வழிபாட்டின் போது சரியான மந்திரப் பிரயோகம் செய்யவேண்டும். அவரை பூக்களாலும், பாக்களாலும் அர்ச்சிக்க வேண்டும். இதெல்லாம் சாத்தியமா என்றால், எப்போதும் சாத்தியமே கிடையாது அல்லவா?

இந்தத் தொல்லைகள் எதுவும் நமக்கு வேண்டாம் என்றால் ஞானிகளின் பாதங் களைப் பிடித்துக்கொண்டால் போதும், நமக்கு விடிவு காலம் வந்துவிடும்.

பக்தி்

எந்த இறை வடிவத்தை நோக்கி வேண்டினாலும் பக்தியில்லாமல் எந்த விக்ஷயமும் நடக்காது. பக்தி இருந்தால்தான் நாமஸ்மரணையில் மனம் ஈடுபடும்.

பக்தியிருந்து, பக்தியோடு வழிபட்டால்தான் நமக்கு கோரிக்கைகள் நிறைவேறும். பக்தியிலும் ஆத்மார்த்த பக்தி, வெளிவேட பக்தி போன்றவை உள்ளன.

”நான் பாபாவிடம் வேண்டிக் கொள்கிறேன்.  நிறைய பக்தி செலுத்துகிறேன், ஆனாலும் கோரிக்கை நிறைவேறவில்லை!”  என்று நம்மில் பலர் கூறுவார்கள். இதற்குக் காரணம், பக்தி என்பது ஆத்மார்த்தமாக, எதிர்பார்ப்பு எதுவும் இல்லாமல் செய்யப்பட வேண்டிய ஒன்று.

சத்சரித்திரம் கூறுகிறது: சாயி பாபாவின் மீது எந்த ஒரு பக்தனுக்கு முழுமனதான, பூரணமான பக்தி ஏற்படுகிறதோ அவனது கேடுகளும் அபாயங்களும் துடைக்கப்பட்டு அவனது நலம் பாபாவால் கவனிக்கப்படுகிறது. (அத்: 25)

நாமோ எதிர்பார்த்து பக்தி செய்கிறோம். அதனால் வேண்டுதல்கள் பல வேளைகளில் நிறைவேறாமல் போய்விடும். அந்த நேரத்தில் இதுவரை வேண்டி பக்தி செய்துவந்ததை மாற்றிக் கொள்கிறோம். இது மேலும் துன்பத்தையே கொண்டு வரும்.

இதை சரிசெய்ய நாம் என்ன செய்யவேண்டும் என்றால், ஞானிகளின் பாதங்களைப் பிடித்துக்கொண்டு, என்னைக் காப்பாற்றுங்கள் என சரணடைந்துவிட வேண்டும்.

நமக்காக அவர்கள் இறைவனிடம் பிரார்த்தனை செய்வார்கள். தவிர, அவர்களே மண்ணில் இறங்கி வந்த இறைவனாக இருப்பதால் உடனடியாக நமது வேண்டுதலுக்கு உருகி பதில் அளிப்பார்கள்.

அப்படிப்பட்ட ஞானியை நான் எங்கு போய் தேடுவது எனக் கேட்கவேண்டாம். இருக்கவே இருக்கிறார் பாபா. அவரது பாதங்களை முழுமையாக பிடித்துக் கொண்டு சரணடைந்துவிடுங்கள். பிறகு அனைத்தும் சாத்தியமாவதை நடைமுறையில் உணர்வீர்கள்.

ஸ்ரீ  சாயி வரதராஜன்

ஸ்ரீ சனி பகவான் பரிகாரத் திருத்தலம்

பக்தர்களின் கிரக தோக்ஷம் நீங்குவதற்காக சாயி பாபாவின் அனுக்கிரகம் மற்றும் குரு தேவர் ஸ்ரீ சாயி வரதராஜன் ஆசியுடன் நவம்பர் மாதம் கீரப்பாக்கம் மலையில் சனி பகவான் பரிகாரத்திருத்தலம் அமைக்க வாஸ்து பூஜை போடப்பட்டது.

அனுபூதி சித்தர் வாஸ்து பூஜையை நடத்தினார். சமதர்ம சமாஜ் அறக்கட்டளையின் பொருளாளர் ஸ்ரீதரன் மற்றும் வேணுகோபால், ஆறுமுகம், கீரப்பாக்கம் ரவி, சுவாமி உட்பட பலர் கலந்து கொண்டார்கள்.

எல்லோருக்கும் மேலான தெய்வமான சத்குருவை சரணடைந்தவர்களுக்கு கிரக தோக்ஷத்தால் பாதிப்பு ஏற்படாது. ஆனால், முற்றிலும் சத்குருவை சரணடையாமல் பக்தர்களாக உள்ளவர்கள் பரிகாரம் தேடி, பல இடங்களுக்கு அலைகிறார்கள். இவர்களுக்குப் பணச் செலவும், நேரச்செலவும் ஏற்படுவதுதான் மிச்சம்.

இவர்களின் குறைகளைப் போக்குவதற்காக இந்த பரிகாரத் திருத்தலம் அமைகிறது. மகாராஷ்டிர மாநிலம் சனி சிக்னாப்பூரில் உள்ளது போன்று திறந்த வெளியில் சனி பகவானை பிரதிஷ்டை செய்து எதிரில் மண்டபம் நிறுவத் திட்டமிடப்பட்டுள்ளது. இதற்கான கைங்கர்யத்தை பெருங்களத்தூர் பிரார்த்தனை மையத்தில் நேரடியாகவோ அல்லது உறையிட்ட கவரில் வைத்து அஞ்சல் மூலமாகவோ அனுப்பி வைக்கலாம். பக்தர்கள் தாங்களாக சனி பகவானை சேவித்து, பூஜை செய்து பலனடையலாம்.